"MUSICA ADDIROSA" di Vincenzo De Bernardo

Dicette ‘o garofano nfaccia a na rosa: “Stasera t’aspetto, te voglio addurà!”-

- “Ma pe’ piacere, ca nun è cosa e, mò, leve mano, fatte cchiù allà!”-

- “Neh, Rusinè, già t’’e scurdata, chelli parole, a chi ‘e dicive?

Dimme pecchè, mò, si cagnata, ‘a quando int’’e braccia, tu, me svenive?!

Io nun capisco st’atteggiamento, dimme ch’è stato, ma ch’è succieso?

Pe’ quale ragione, stu cambiamento, ho fatto qualcosa ca, forse, t’ha offeso!?”-

- “ Ma vuje ‘o sentite chisto mamozio, ma comme te vene, ‘a vuò fernì,

nun te fa sentere, int’’o negozio, ce sta ‘o fioraio ca ce po’ sentì;

pe’ te ho tenuto na simpatia ma è stato primma che andavi soldato,

tu. mò, che vuò, ‘a ruvina mia...? ‘O matrimonio già, ‘o tengo appuntato!

So’ fidanzata, ormai, con un giglio e fra tre mise, ce avimma spusà!”-

-“Chist’è n’affronto, pe’ chi me pigli, sulo c’’o sango s’adda lavà!”-

Dicette ‘a rosa: “Neh, uè, fusse scemo, ma guarda, nu poco, che situazione

tu damme ‘o tiempo ca te sistemo e t’’a cerco io na bella guagliona.

Se proprio hai bisogno ‘e na nnammurata, io t’’a trovo int’’a nu mumento,

conosco na viola assai appassionata e saccio che già te fa ‘o sentimento!”-

E fu accussì ca chistu “Schiavone” s’annamuraie d’’a Viola “zita”,

uè, fu n’incontro chino ‘e passione ca, po’, è durato tutta na vita.

E comme ogni storia ca se rispetta, già steve scritto int’’o destino,

‘a Viola al Garofano, disse: “Io aspetto” e doppe nu poco nacque un Violino.

Piaceva ‘a musica a chisto criaturo, capite nun era na nuvità

e ghieve giranno cu ‘e sunature, p’’e strade e viche ‘e tutt’’a città.

Nu juorno, int’’a uno ‘e chisti festini, vedette na bella e formosa chitarra,

na bella voce, uocchie curvine: “M’’a voglio spusà, senza farmi distrarre!”-

Mò, sonano, nzieme, ’a famiglia è crisciuta, teneno già un bel clarinetto,

pur’isso, p’’a musica, è nu patuto, hanno formato nu bello terzetto.

Po’, è arrivato un ottavino, po’, nu tamburo tunno-tunno,

l’ultimo è stato un mandolino e sono famosi pe’ tutt’’o munno.

Purtoppo ’a chitarra s’è fatta anziana, ormai ‘e corde so’ tutte grigie

e pensa: chissà se arrivo a dimane, e ‘a notte s’addorme dint’’a valigia.

Ma nun ha perso, mai, l’abitudine e, ‘a sera, ogni tanto s’affaccia ‘a finestra

e aspetta, pure, si stanno luntano, ca s’arritira tutta l’orchestra.

S’assettano a tavola, piatti e piattini, intanto, ‘o vino ha già fatto effetto,

s’addorme ‘o tamburo, è stanco ‘o viulino, se stuta ‘a luce e, po’, vanno a letto.

E tutte nzieme se sonnano ‘e note ca saglieno e scenneno p’o pentagramma,

sultanto l’ultimo, si no, arrevota, s’addorme, tranquillo, int’’e braccia d’’a mamma!

Wincenzo De Bernardo Autore del Giorno Anima di Vento settembre 2019