Ma che faccio... di Vincenzo De Bernardo

Ma che ce faccio io, sola int’’a stu lietto,
pare c’’a vita m’’o fa pe’ dispietto,
nu mumento ca te siente ‘a fila appriesso
e, po’, te siente, sola cu te stesa!
Certo, nun sempe, po’, dipende ‘a te,
troppe domane, troppe so’ ‘e pecchè?
Cirche ‘e capì ma nun truove ‘e risposte,
piense: ‘o destino m’’o facesse apposta?
Appena dici: si, l’aggio truvato,
t’accuorge, po’, ch’è diventato n’ato!
Comme a nu libro, na pagina nova,
‘a vita te fa fa chest’ata prova!

E me dumando ch’era ‘a vita mia,
primma ‘e quando t’aggio cunusciuto,
‘o juorno quando me si’ accumparuto,
‘a primavera è spuntata pe’ mme!

Certo, c’è stato qualche giuvinotto
ca m’ha purtato qualche mazzo ‘e rose,
na pizza…, se faceva qualche cosa,
po’, comme ‘o viento…, niente, niente cchiù!

Tu, invece, ire trasuto int’’a stu core,
trasuto è poco, tu me l’he squarciato,
io nun m’’o spiego, ancora, comm’è stato,
ca nun putevo fa cchiù a meno ‘e te!

Mò, che ce faccio, io sola, int’’a stu lietto,
pare c’’a vita m’’o fa pe’ dispietto!

@Vincenzo De Bernardo Autore del Giorno Anima di Vento 12/02/2018

Foto dal Web