PULLECENELLA di Vincenzo De Bernardo

- “Io songo ’a statua ‘e Pullecenella,
na vota facevo ‘o cameriere,
mò stongo mmieze ‘e bumbuniere,
chiuso dinto a nu buffet.

Me trovo dint’’a stanza ‘e pranzo,
tengo na posizione ‘e riguardo,
chi me parla, mentre me guarda:
-” Si’ ‘o ritratto ‘e sta città!”

Seh, na vota, ero ‘o ritratto
e stevo ncopp’’e cartuline,
mentre sunavo ‘o mandulino,
mò, che ne parlammo a fa!

Io nun ce capisco niente,
primma era tutta n’ata cosa,
mò, ‘a notte, se dorme ma nun s’arreposa,
pe’ ll’aria, se sente n’elettricità.

Io tengo ancora tanti ricorde,
na vota, ce steve tanta priezza,
mò, mmiez’’a via ce sta sulo munnezza,
e ‘o traffico nun te fa respirà.

Na vota, ’a notte, s’asceva p’’a via,
llà, me ncuntravo cu Colombina
e se sunava fino ’a matina,
c’’o scetavajasse e c’’o putipù.

E ch’alleria, che tarantelle,
mò nun è cosa, addò te presiente,
mò truove sulo na massa ‘e fetiente,
me fa paura a ce cammenà.

‘E scugnizze, è overo, facevano ‘e scherzi,
chi me scippava, ‘a capa, ‘o cappiello,
mò, ‘a copp’’e dete, te sfilano anielle,
io nun me posso capacità.

Io, chesti ccose, nun l’aggio mai viste,
acciremiente, scippe, rapine,
e, po’, s’accattano ‘a cocaina
ca nun ‘e fa, manco, cchiù arraggiunà.

Pe’ tutte sti cose ca v’aggio cuntato
e ca succedono, mò, tutt’’e juorne,
io, ve cunfesso, me metto scuorno
e ‘a maschera nun m’’a pozzo levà!”-

@Wincenzo De Bernardo

Autore del Giorno Anima di Vento 25/03/18

imm. dal web